人物設定
- 一心：初級基督徒。害羞怕出醜，但對主的道有興趣。
- 允行：中級基督徒。暗記許多屬靈道理，然而不求甚解。
- 家寶：高級基督徒。喜歡批評別人，討厭提供己見。
- 修端：神級基督徒。經常主持大局。自覺高人一等，見解獨到。享受別人的讚美。
劇本
修端：大家好，歡迎大家又嚟到一星期一次嘅查經環節。今日，我哋會查馬太福音 5:27-30。有冇人有感動想讀出嚟？
〈十秒後〉
修端：好啦咁我讀啦。「你們聽過⋯⋯如果你的右手使你犯罪，就把它砍下來丟掉；寧可失去身體的一部分，勝過全身進到地獄裡去。」大家聽咗一次之後，有冇咩問題想問？
〈十秒後〉
一心：⋯⋯嗯⋯⋯
家寶：咦！？一心好似有嘢想問喎！
一心：吓！？嗯，唔係，其實都唔係好重要姐⋯⋯
修端：唔緊要㗎一心，呢個世界冇咩愚蠢嘅問題。你講出嚟，睇吓我哋幫唔幫到你？當然，如果你唔舒服嘅話，我唔會逼你嘅⋯⋯
一心：⋯⋯其實點解一個咁愛人嘅神會送人入地獄嘅？
〈十秒後〉
允行：因為佢都係個公義嘅神呀！你試諗吓，一個真係愛你嘅爸爸會唔會縱容自己個仔呢？
一心：但係，既然佢咁愛我哋，點解佢要將一D人送去地獄永遠受折磨呢？我想像唔到我 Daddy 會噉樣對我⋯⋯
〈十秒後〉
家寶：你自己覺得點解？
一心：因為⋯⋯上帝係 50% 時候慈愛，50% 時候公義嘅神？
允行：唔係呀一心，上帝係 100% 慈愛，又 100% 公義嘅神呀！
一心：吓！？加起嚟咪 200% 囉！？
允行：係呀，我哋個神好犀利哩？
家寶：⋯⋯允行，你噉講又好似有 D 拋棄理性喎⋯⋯
允行：唔係「拋棄理性」呀家寶。我係「超越理性」！
家寶：⋯⋯此話何解？
允行：聖經有一句話：「凡事都可作，但不都有益處」。呢句話一直都係我嘅座右銘。上帝有好多奧秘，我哋根本唔應該深究。理性分析，你固然可以做⋯⋯但如果答案係神故意隱藏嘅話，益處根本唔大——
家寶：噉感性思考又一定有益處咩？
允行：有！絕對有！我每次遇到困難，覺得好難受好委屈嘅時候，我都會提醒自己，有冇同上帝好好溝通呀？之後我就會合埋雙眼，尋求神嘅聲音。去到最後，就算乜都唔明，我心裏自然都會有一份來自上帝嘅平安——
家寶：你每次見到難題，就合埋眼當睇唔到，你內心梗係平安啦！
允行：你⋯⋯！
修端：允行，家寶，冷靜 D。弟兄之間要彼此相愛呀。
家寶，允行：⋯⋯
修端：允行，你頭先啱啱想講 D 咩呀？
允行：⋯⋯所以一心，聽我講。唔知道點解主會送人入地獄，唔緊要嘅。只要好好同神溝通，即使冇一個好嘅答案，我相信神一定會畀你平安㗎。
家寶：⋯⋯唉。
一心：家寶，你又點睇？一個慈愛嘅神點解會送人落地獄？
家寶：每個人尋求神嘅時候，都會有唔同嘅領受。我就算同你講，都唔會有咩意義。答案，係要自己去搵先有意義。講完。
一心：？？？
修端：好喇，睇落嚟時間都差唔多喇。上帝點解要懲罰人呢個話題，涉及一 D 幾深入嘅神學問題，要講就要講好耐。正如允行所講，神嘅話語係充滿著奧秘㗎。不如呢個話題，我哋遲 D 再搵個時間傾？
一心：好呀。噉我哋幾時再傾呀？
修端：呢層⋯⋯不如我哋再遲 D 先約個時間吖？好，查經環節完結，不如我哋嚟個結束祈禱？